بقى لو كان 30 يونيو عدى من غير ما السيسى ياخد الموقف ده ،ففى ناس كتير كان عندهم نية لتسليح انفسهم ،ده غير نية الدقنجية على ارتكاب مجازر
الدقنجية ليهم فترة عندهم تعطش للدم والعنف والقمع ،وليهم شهور بيهتفوا "اضرب يا مرسى اغضب يا مرسى" ومكنش هيبقى عندهم اى نوع من الرحمة
والثوار اللى بجد مش النائحين على الساقطة واللاقطة كانوا عارفين ان اللى جاي يا قاتل يا مقتول ،وكتير منهم كان بيجهز نفسه للمرحلة دى
والنوع ده من الاقتتال لو بدأ والجيش لم يتدخل ،كان اللى هيحصل مع الوقت ان سوريا هتبقى رحمة بالنسبة لنا ، وكان فى ثوار كتير هيموتوا بالتأكيد
لكن كمان "كل" الدقنجية وأنا أعنى ما أقول "كل" الدقنجية مش هيتساب منهم حد ،يعنى ال 50 واحد اللى مزعلينكم دول ولا حاجة فى الحقيقة
انا شخصيا كنت متوقع إن الجيش يعمل زى أيام طنطاوى ويطلع نفسه بره اللعبة لغاية ما نخلص على بعض وبعدين يفرض سيطرته
ومع الوقت كان هييجى تمويل للدقنجية من دول وسخة زى قطر ،وساعتها الثوار مكانوش هيقدروا يرفضوا تمويل بالسلاح من اى حتة ولو كان ابليس
يعنى لو الجيش وسخ زى ما بشوف فى تلميحاتكم كان هيستنى كتير لغاية ما نصفى بعض حرفيا ومع كل بنى ادم بيقع هيخلى غيره يدخل الحرب انتقاما له
وانا شخصيا كنت متوقع مش أقل من 10 آلاف قتيل وكنت دايما بتكلم عن اللى هيحصل كحرب أهلية مصغرة ،هتكون نهاية معظم الثوار والدقنجية وميتبقاش
الا كنبة وفلول وجيش ،، لا وكمان كان الجيش هينزل الارض بعد ما يبقى ده مطلب شعبى ودولى كمان مش شعبى وبس
وغالبا ده ما كان هيبقى افضل سيناريو مطروح لو انا مكان قيادة الجيش وانتمائى للفلول ومصالحى بشكل براجماتى ميكافيللى بحت
لكن فى الحقيقة البلد ربنا كرمها بمجموعة ،فضلت انها تحط السكينة على رقبتها عشان السيناريو الذى لا يمكن ايقافه ده ميبتديش ،ايوة تحط السكينة
تخيلوا لو كانت المغامرة بعزل مرسى فشلت ،تخيلوا لو كان فى حاجة واحدة بس متعملش حسابها ومرسى كمل ،تخيلوا المجلس العسكرى ده كان زمانه فين؟
أنا شخصيا قعدت مع نفسى كتير وتخيلت مواقف القتل وجهزت نفسى لابعد حد للسيناريو اللى كنت متوقعه .. سيناريو الإحتراب وانى مترددش ساعة الجد
الناس قبل ما تشغل النحنحة لازم تدرك ان اللى بيحصل ،ولسا هيحصل من الجيش لمحاولة السيطرة على مجانين الارهاب ،ده مش اهدار دم ،ده منع لدم
واللى هيحصل فى سينا وطلب الجيش لفتوى الأزهر ببداية الضرب رغم توقع سقوط أبرياء ،هيكون ايقاف لدم مش اهدار دم ،وطبعا النحنحة هتزيد
طبعا فى ناس بتعمل كدا لإنها مش مدركة الواقع ،لكن فى ناس وسخين فعلا بيتنحنحوا لسبب تانى خالص ،سبب مفهوم عند كتير ولو كان غير معلن
الكل فاهم إن التحرك العسكرى كان هدفه الإنتصار لحاجات كتير طالبت بيها الثورة ،يمكن في بعض الاختلاف لكن فى المجمل لا يمكن تفسيره الا كدا
لما يبقى فى حد بيتحرك لنفس الأهداف فى المجمل ،وكمان بيتحمل مخاطرة لا تقل إن لم تكن تزيد عن اللى أنا اتحملته فى الثورة ،يبقى هيتحسب ثائر
الخوف عند البعض هنا ،انه لما الوعي الشعبى يعتبر الجيش جيش ثائر تروح عليهم المكاسب اللى كسبوها فى الموجة الاولى من سنتين
قوم إيه لازم أستبق وأشكك وأعمل حسابى على معركة قادمة أحاول فيها إنى احتفظ بمكاسبى من الموجة الاولى ،فلازم أحضر من دلوقتى للهجوم
ورغم إنى فاهم كويس إن الجيش حتى الآن وبالنسبة لكل اللى شوفناه فى التاريخ هو فى الحقيقة إيده لسه حنينة قوى ،لكن لازم اتشنج وأفور بكل قوة
رغم إنى مريت بتجربة مع قيادة كان عندها عقيدة ضد الموجة الأولى ومع ذلك سلمت السلطة ،مع ذلك اشكك فى قيادة مع الموجة التانية وبتقول هتسلم
وفى وسط كل ده هغمض عينى عن الشحاتين اللى ملوا الشوارع والدولار اللى زاد ،والناس الغلابة اللى اتطحنت هغمض عينى عن مسؤوليتى كثائر
اللى بيثور عليه مسؤولية كبيرة حضرتك ،لما ثورتك تنقل الناس لحال أسوء ،ولوضع إنعدام الأمل ،تبقى مصيبة مش ثورة ،احمد ربنا ع الفرصة الثانية
الموقف الطبيعى انى لا أتبنى شكوك ضد شريك الموجة الثانية (الجيش) قبل ما تظهر علامات قوية ،وهكون أكثر إدراكا للمسؤولية من الاول
وكون إن البعض عنده مشاكل نفسية تجاه السلطة فدى حاجة تخصهم ،أنا قدامى سلطة بتقولى كشعب "إستخدمنى" وده الوضع الطبيعى ليها وليا
ولو خايف من إن السلطة بتغير النفوس إن السلطة ممكن تفسد صاحبها ،فمش بقولك سيبله الساحة يستبد بيها ،لكن راقبه للمصلحة مش كره مسبق
إفهم إنك عملت ثورة و كملت موجتها التانية الحمدلله ،وإن السلطة دلوقتى أضعف منك ،وإنك غيرت المعادلة الى إنك تراقبها مراقبة الاب لإبنه مش الإبن الكاره لأبوه
إذا كنا طول عمرنا بنرفض إن السلطة تعاملنا معاملة الأب ،دى فرصتنا إننا إحنا اللى نعاملها معاملة الأب ،إحنا الأقوى
أرجوكم ،لا تخذلوا شريك ثورة 30 يونيو ،من يخذل رفاق ثورته يستحق بجدارة مزبلة التاريخ ولكم فى الاخوان عبرة ،وتأكدوا أن المعادلة تغيرت. إنتهى
ليست هناك تعليقات:
إرسال تعليق